Mei Gehzeig
I bin heit mit’n Gehzeig in die Kirch’n gangen,
so hod der Tog scho amol recht guat ang‘fangen.
Mei Gehzeig is wirkli a super Maschien,
hod kuan Motor und braucht weda Strom noch Benzin.
Hod Plotz für zehn oder goa nau mehr Leit,
is quasi a Kleinbus und deis Geh‘n mocht a Freid.
Wenn ma unterwegs is mit dem hulzenen Vehikl,
kaun ma d’Leit griaßn und sie einlod‘n zum Mitgeh’n a Stickl.
Ma erzeigt kuan Feinstaub und kua CO2,
wenn’s regn‘t hod ma a Jackn und an Huat dabei.
Deis Gehzeig soll uns zoagn, wia vül Plotz mia verschwend’n,
wenn ma so weidertuan, wo wird deis wohl enden?
Fia deis Auto, mit dem wir olli so liebend gern foah’n,
dem ma heitzutog oll‘s unterordn‘t, mia Noan.
Deis wichtigste is oft, vül Parkplätz zu schoff’n,
da Plotz für uns Mensch’n ist daun hold Nebensoch’n.
Deis soullt’n wir ändern, soullt ma uns guat überleg’n,
wos uns guat tuat and wichtig is für a g’sundes Leb’n.
Olsou gemas aun, hom nimma vül Zeit zu verschwenden,
weil sunst wird deis olls in an Fiasko wohl enden!
Die Autos san a Seg’n für unsre g‘wohnte Mobilität,
oba loss mas uafoch steh‘n, so oft’s nur irgendwie geht.
Foahn ma mit’n Radl, mit’nBus oda Zug oda geh’n überhaupt z’Fuaß,
Unsre Enkerl wearn klotschn, und schick‘n an schein Gruaß!
Lorenz Lenzsteiner
